15 de febrero. Santiago. Onte os mozos e mozas de cuarto da ESO do IES Campo de San Alberto de Noia, dedicaron parte da mañá a realizar un programa de radio na aula para loitar contra a pobreza. A promoción da Ría da Estrela, o furtivismo, a contaminación o ou consumismo na música trap, foron as mensaxes creadas polos rapaces e rapazas que mais se repetiron durante o programa radial que forma parte do proxecto de educación en valores O Mundo que Queremos.
Nun obradoiro anterior impartido fai varias semanas, aprenderon a usar a radio e o vídeo como ferramentas de transformación social e durante estes últimos días estiveron recompilando información para construír os seus propios discursos.
Esta actividade na que participan mais de noventa alumnos e alumnas de Noia, forma parte do proxecto de Educación en Valores “O Mundo que Queremos” que durante este curso está a achegar a oito centros educativos galegos as problemáticas que afectan aos países empobrecidos pero tamén ao seu propio entorno, a través de dinámicas innovadoras e participativas como xogos de rol, obradoiros de radio e vídeo, teatro da oprimida ou a visita ás súas escolas de persoas que traballan en outros países fomentando a transformación dos mesmos.
Cooperación Galega: O Mundo Que Queremos (OMQQ) é unha iniciativa que naceu no ano 2013 impulsada por cinco entidades distintas para fomentar una xuventude máis critica, responsable e participativa. É un proxecto financiado pola Dirección Xeral de Relacións Exteriores e coa UE, que forma parte da plataforma de innovación educativa ‘Plan Proxecta’, impulsada pola Consellería de Cultura, Educación e Ordenación Universitaria.
ESCOITA AQUÍ FRAGMENTOS DO PROGRAMA